وکی پیڈیا کے مطابق پاکستان کے نام ور فلمی لوک و فلمی گلوکار، کمپیئر، اداکار اور سیاست دان عنایت حسین بھٹی 12 جنوری 1928ء کو ضلع گجرات، برطانوی ہندوستان (موجودہ پاکستان) میں پیدا ہوئے۔
فلمی زندگی کا آغاز بطورِ گلوکار کیا۔ فلم ’’ہیر‘‘، ’’پھیرے‘‘، ’’لارے‘‘، ’’شمی‘‘ وغیرہ میں آپ کے گائے ہوئے نغمات بے حد مقبول ہوئے تھے۔ 1953ء میں فلم شہری بابو میں ایک فقیر منش سائیں کا کردار ادا کیا جس پر انھی کا گایا ہوا نغمہ ’’بھاگاں والیو نام جپو مولا نام فلم بند ہوا‘‘ اور پھر یہی نغمہ ان کی شناخت بن گیا۔
1955ء میں شباب کیرانوی نے اپنی فلم جلن میں مرکزی کردار ادا کرنے کی پیشکش کی۔ اس کے بعدایک طویل عرصہ تک فلموں میں مرکزی کردار ادا کرتے رہے۔ بطورِ اداکار فلموں کی کل تعداد 54ہے، جس میں 52 پنجابی زبان میں بنائی گئی تھیں۔
عنایت حسین بھٹی کی آخری فلم ’’عشق روگ‘‘ 1989ء میں نمایش پذیر ہوئی۔1985ء کے عام انتخابات میں قومی اسمبلی کی ایک نشست پر انتخاب لڑا، مگر کامیاب نہ ہو سکے۔ پاکستان کے مشہور فلمی اداکار ’’کیفی‘‘ ان کے بھائی، ٹیلی وِژن کے مشہور فن کار وسیم عباس صاحب زادے اور ٹیلی وِژن ہی کے ایک اور اداکار آغا سکندر داماد تھے۔
31 مئی 1999ء کو ضلع گجرات میں انتقال کرگئے۔
