موقر نشریاتی ادارے ’’سی این این‘‘ (CNN) کے مطابق ملکۂ الزبتھ دوم (Queen Elizabeth II)، ملکۂ برطانیہ 8 ستمبر 2022ء کو انتقال کرگئیں۔
وکی پیڈیا کے مطابق 21 اپریل 1926ء کو لندن، برطانیہ میں پیدا ہوئیں۔ مکمل نام ’’ایلزبتھ الیگزینڈرا میری‘‘ تھا۔ مملکتِ متحدہ کی ملکہ اور دولتِ مشترکہ قلم رو کی آئینی ملکہ تھیں۔ ابتدائی تعلیم گھر پر حاصل کی۔ سال 1947ء میں شادی شہزادے فلپ کے ساتھ ہوئی، جن سے 4بچے ہیں۔ جب ان کے والد بادشاہ جارج ششم کا 1952ء میں انتقال ہوا، تب الزبتھ دولتِ مشترکہ کی صدر بن گئیں۔ تاج پوشی سال 1953ء میں ہوئی اور یہ اپنی طرح کی پہلی ایسی تاج پوشی تھی جو ٹیلی وِژن پر نشر ہوئی۔ 9 ستمبر 2015ء کو ملکۂ وِکٹوریا کے سب سے لمبے دورِ حکومت کے ریکارڈ کو توڑ دیا اور برطانیہ پر سب سے زیادہ وقت تک حکومت کرنے والی ملکہ بن گئیں۔ پوری دنیامیں سب سے عمردراز حکم ران اور سب سے لمبے وقت تک حکومت کرنے والی ملکہ تھیں۔