وکی پیڈیا کے مطابق اردو زبان کے صاحبِ طرز شاعر اور مزاح نگار ابنِ انشاؔ 11 جنوری 1978ء کو لندن میں انتقال کر گئے۔
آپ کا اصل نام شیر محمد خان تھا اور انشاؔ تخلص کرتے تھے۔ آپ 15 جون 1927ء کو جالندھر کے ایک نواحی گاؤں میں پیدا ہوئے ۔1946ء میں جامعۂ پنجاب سے بی اے اور 1953ء میں کراچی یونیورسٹی سے ایم اے کیا۔ 1962ء میں نیشنل بک کونسل کے ڈائریکٹر مقرر ہوئے۔ ’’ٹوکیو بک ڈولپمنٹ پروگرام‘‘ کے وائس چیئرمین اور ’’ایشین کو پبلی کیشن پروگرام ٹوکیو‘‘ کی مرکزی مجلس ادارت کے رکن تھے۔ روزنامہ جنگ کراچی اور روزنامہ امروز لاہورکے ہفت روزہ ایڈیشنوں اور ہفت روزہ اخبارِ جہاں میں ہلکے فکاہیہ کالم لکھتے تھے۔ دو شعری مجموعے ’’چاند نگر‘‘ اور ’’اس بستی کے کوچے میں‘‘ 1976ء کو شائع ہوچکے ہیں۔ 1960ء میں چینی نظموں کا منظوم اردو ترجمہ (چینی نظمیں) شائع ہوا۔
