شریعت اسلامیہ میں جتنی تاکید کے ساتھ انسان کے قتل کی حرمت کو بیان کیا گیا ہے، عصرِ حاضر میں اس کی اتنی ہی بے حرمتی ہورہی ہے۔ چناں چہ معمولی معمولی باتوں پر قتل کے واقعات روزانہ اخباروں کی سرخیاں بنتے ہیں۔
افسوس کی بات یہ ہے کہ ان دنوں بعض مسلمان بھی اس جرم کا ارتکاب کبھی کبھی دینی خدمت سمجھ کر کر جاتے ہیں۔ حالاں کہ قرآن و حدیث میں کسی انسان کو ناحق قتل کرنے پر ایسی سخت وعیدیں بیان کی گئی ہیں جو کسی اور جرم پر بیان نہیں ہوئیں۔ اسلامی تعلیمات کے مطابق کسی انسان کو نا حق قتل کرنا شرک کے بعد سب سے بڑا گناہ ہے بلکہ بعض علما نے سورۃ النسا آیت نمبر ۹۳ کی روشنی میں فرمایا ہے کہ کسی مسلمان کو ناحق قتل کرنے والا ملت اسلامیہ سے ہی نکل جاتا ہے۔ اگرچہ جمہور علما نے قرآن وحدیث کی روشنی میں تحریر کیا ہے کہ کسی کو ناحق قتل کرنے والا بہت بڑے گناہ کا مرتکب تو ضرور ہے، مگر وہ اس جرم کی وجہ سے کافر نہیں ہوتا ہے اور ایک طویل عرصہ تک جہنم میں دردناک عذاب کی سزا پاکر آخرِکار وہ جہنم سے نکل جائے گا۔ نیز قرآن وحدیث کی روشنی میں علمائے امت کا اتفاق ہے کہ کسی کو ناحق قتل کرنے والے کی آخرت میں بظاہر معافی نہیں ہے اور اسے اپنے جرم کی سزا آخرت میں ضرور ملے گی۔ اگرچہ مقتول کے ورثا قاتل سے قصاص نہ لے کر دیت وصول کرلیں یا اسے معاف کر دیں۔
حضور اکرمؐ نے بھی کسی کو ناحق قتل کرنے پر سخت سے سخت وعیدیں ارشاد فرمائی ہیں اور امت کو اس سنگین گناہ سے باز رہنے کی بار بار تلقین فرمائی ہے۔ اختصار کے مدنظر صرف دو حدیثیں پیش خدمت ہیں:
٭ حجۃ الوداع کے موقع پر آپؐ نے اپنے عظیم خطبہ میں اس بات پر بھی زور دیا کہ کسی کا خون نہ بہایا جائے، چناں چہ ارشاد فرمایا: ’’تمہارے خون، تمہارے مال اور تمہاری آبروئیں ایک دوسرے کے لئے ایسی ہی حرمت رکھتی ہیں، جیسے تمہارے اس مہینے (ذی الحجہ) میں تمہارے اس شہر (مکہ مکرمہ) اور تمہارے اس دن کی حرمت ہے۔ تم سب اپنے پروردگار سے جاکر ملو گے، پھر وہ تم سے تمہارے اعمال کے بارے میں پوچھے گا ۔ لہٰذا میرے بعد پلٹ کر ایسے کافر یا گمراہ نہ ہوجانا کہ ایک دوسرے کی گردنیں مارنے لگو۔ (صحیح بخاری۔ باب حجۃ الوداع)
یعنی کسی شخص کو ناحق قتل کرنا کافروں اور گمراہوں کا کام ہے نیز ایک دوسرے کو کافر یا گمراہ کہہ کر قتل نہ کرنا۔
٭ حضرت انس رضی اللہ عنہ فرماتے ہیں کہ حضوراکرمؐ نے ارشاد فرمایا: کبیرہ گناہوں میں سے سب سے بڑے گناہ یہ ہیں: اللہ کے ساتھ کسی کوشریک ٹھہرانا، کسی انسان کو قتل کرنا، والدین کی نافرمانی کرنا اور جھوٹی بات کہنا۔ (صحیح بخاری۔ باب قول اللہ تعالیٰ من احیاھا)
قتل کی اقسام اور ان کی سزا:۔ اگر کوئی شخص کسی دوسرے شخص کو قتل کردے، تو آخرت میں دردناک عذاب کے ساتھ دنیا میں بھی اسے سزا ملے گی جس کو قرآن وحدیث کی روشنی میں اختصار کے ساتھ بیان کررہا ہوں۔ سب سے پہلے سمجھیں کہ قتل کی تین قسمیں ہیں: قتلِ عمد، قتلِ شبہ عمد، قتلِ خطا۔
قتلِ عمد (یعنی جان بوجھ کر کسی کو ناحق قتل کرنے) کا حکم:۔ قتل عمد وہ ہے کہ ارادہ کرکے کسی شخص کو آہنی ہتھیار سے یا ایسی چیز سے جس سے عموماً قتل کیا جاتا ہے، قتل کیا جائے۔ مثلاً کسی شخص کو تلوار یا گولی سے مارا۔
قتل عمد:۔ یہ شرک کے بعد سب سے بڑا گناہ ہے اور مرنے کے بعد قاتل کو دردناک عذاب ہوگا، جیسا کہ اللہ تعالیٰ نے سورۃ النسا آیت نمبر 93 اور سورۃ الفرقان آیت نمبر 68 اور 69 میں بیان فرمایا ہے کہ جو شخص کسی مسلمان کو جان بوجھ کر قتل کرے، تو اس کی سزا جہنم ہے جس میں وہ ہمیشہ رہے گا اور اللہ اس پر غضب نازل کرے گا اور لعنت بھیجے گا اور اللہ نے اس کے لیے بڑا عذاب تیار کررکھا ہے۔
قصاص یا دیت یا معافی:۔ قتل ثابت ہونے پر مقتول کے ورثا کو اختیار ہے کہ وہ اسلامی حکومت کی نگرانی میں قاتل سے قصاص لیں، یعنی حکومت قاتل کو قصاصاً قتل کرے۔ شریعتِ اسلامیہ نے مقتول کے ورثا کو یہ بھی اختیار دیا ہے کہ وہ قاتل کو قصاصاً قتل نہ کراکے قاتل کے اولیا سے دیت یعنی سو اونٹ کی قیمت یا اس سے کچھ کم یا زیادہ پیسہ لے لیں یا معاف کردیں۔
وراثت سے محرومی:۔ اگر قاتل نے اپنے کسی قریبی رشتہ دار کو قتل کردیا، تو وہ مقتول کی وراثت سے محروم ہوجائے گا، مثلاً کسی شخص نے اپنے والد کو قتل کردیا، تو وہ والد کی وراثت سے محروم ہوجائے گا۔
قتل شبہ عمد کا حکم:۔ اگر کسی شخص نے کسی شخص کو ایسی چیز ماری جس سے عام طور پر قتل نہیں کیا جاتا ہے، مثلاً پتھر، ڈنڈا، گھونسا، کوڑا وغیرہ مگر وہ اس کی وجہ سے مرگیا، تو یہ بھی قتل ہوگا، لیکن اس قتل پر قصاص نہیں آئے گا۔ البتہ یہ بھی بڑا گناہ ہے۔ کیوں کہ اس میں قصد پھر بھی ہے۔ اگرچہ قتل عمد سے کم ہے۔ اس کے علاوہ مقتول کے ورثا کو دیت لینے کا حق حاصل ہوگا۔ اگر فریقین راضی ہیں، تو دیت سے کم یا زیادہ قیمت پر بھی صلح کرسکتے ہیں۔
قتل خطا کا حکم:۔ اگر کسی شخص سے غلطی سے کسی شخص کا قتل ہوجائے، مثلاً جانور کا شکار کر رہا تھا، مگر وہ تیر یا گولی غلطی سے کسی شخص کے لگ گئی اور وہ مرگیا، اس میں قصاص تو نہیں ہے، البتہ شریعتِ اسلامیہ نے مقتول کے ورثا کو یہ اختیار دیا ہے کہ وہ قاتل اور اس کے اولیا سے دیت یعنی سو اونٹ کی قیمت یا اس سے کچھ کم یا زیادہ پیسہ لیں یا معاف کر دیں۔ مقتول کے ورثا دیت لیں یا معاف کر دیں لیکن قاتل کو اللہ تعالیٰ سے معافی مانگنے کے ساتھ ساٹھ دن کے مسلسل روزے بھی رکھنے ہوں گے۔
نوٹ:۔ قتل خطا میں بھی بے احتیاطی کا گناہ ہے، کفارہ کا وجوب اور توبہ کا لفظ اس پر دال ہے، اگرچہ قتل شبہ عمد کے مقابلہ میں کم ہے۔
نوٹ:۔ عمومی طور پر گاڑیوں کے حوادث میں مرنے والے افراد بھی قتل خطا کے ضمن میں آتے ہیں، الَّا یہ کہ مرنے والی کی خود کی غلطی ہو۔
نوٹ:۔ قتل عمد اور قتل شبہ عمد میں کفارہ (غلام کی آزادی یا ۶۰ روزے رکھنا) نہیں ہے۔ اگرچہ بعض علما نے قتلِ خطا پر قیاس کرکے قتلِ عمد اور قتلِ شبہ عمد میں بھی کفارہ کے وجوب کا قول اختیار کیا ہے۔
قتل سے متعلق متفرق مسائل:
1:۔ سورۃ المائدہ آیت نمبر ۴۵ کی روشنی میں فقہا وعلما نے تحریر کیا ہے کہ اگر کسی شخص نے کسی شخص کے جسم کے کسی عضو کو تلف کردیا مثلاً آنکھ پھوڑ دی، تو اسے اس کی سزا دی جائے گی۔ الَّا یہ کہ مجروح یعنی زخمی شخص اس کا معاوضہ حاصل کرلے یا وہ جارح کو معاف کردے۔
2:۔ مقتول کی دیت سو اونٹ یا دس ہزار درہم یا ایک ہزار دینار یا اس کے برابر قیمت ہے یا فریقین جو طے کرلیں۔
3:۔ اگر مقتول عورت ہے، تو آدھی دیت یعنی پچاس اونٹ یا اس کی قیمت واجب ہوگی۔
4:۔ کفارہ میں روزے خود قاتل کو رکھنے ہوں گے۔ البتہ دیت قاتل کے اہل نصرت پر ضروری ہوگی جسے شرعی اصطلاح میں عاقلہ کہتے ہیں۔ دیت کی ادائیگی کی ذمہ داری تمام گھر والوں بلکہ تمام قریبی رشتہ داروں پر اس لئے رکھی گئی ہے تاکہ معاشرہ کا ہر شخص قتل کرنے سے نہ صرف خود بچے بلکہ ہر ممکن کوشش کرے کہ معاشرہ اس جرم عظیم سے پاک وصاف رہے، اسی لئے اللہ تعالیٰ نے قرآن کریم میں ایک شخص کے قتل کو پوری انسانیت کا قتل قرار دیا اور ایک شخص کی زندگی کی حفاظت کو پوری انسانیت کی زندگی قرار دی۔ غرضیکہ دیت کی ادائیگی خاندان کے تمام افراد پر رکھی گئی ہے تاکہ دیت کے خوف سے ہر شخص معاشرہ کو قتل سے محفوظ کرنے کی ہر ممکن کوشش کرے۔
5:۔ کفارہ کے روزے میں اگر مرض کی وجہ سے تسلسل باقی نہ رہے، تو از سرنو رکھنے پڑیں گے۔ البتہ عورت کے حیض کی وجہ سے تسلسل ختم نہیں ہوگا، یعنی اگر کسی عورت نے کسی شخص کو قتل کردیا اور وہ ساٹھ روزے کفارہ میں رکھ رہی ہے۔ ساٹھ روزے رکھنے کے دوران میں ماہواری کے آنے سے کوئی فرق نہیں پڑے گا۔ وہ ماہواری سے فراغت کے بعد ساٹھ روزوں کو جاری رکھے گی۔اگر کوئی قاتل اپنی کمزوری کی وجہ سے ساٹھ روزے رکھنے کی استطاعت نہیں رکھتا ہے، تو اسے قدرت تک توبہ کرتے رہنا ہوگا۔
6:۔ دیت میں حاصل شدہ مال مقتول کے ورثہ میں شرعی اعتبار سے تقسیم ہوگا۔ جو وارث اپنا حصہ معاف کردے گا، اس قدر معاف ہوجائے گا اور اگر سب نے معاف کردیا، تو سب معاف ہو جائے گا۔ اگر کسی ایک شرعی وارث نے بھی اپنے حصہ کی دیت کا مطالبہ کرلیا یا معاف کردیا، تو پھر قصاص نہیں لیا جائے گا۔ اب دوسرے ورثا کے لیے دو ہی اختیار ہوں گے یا تو اپنے حصہ کی دیت لیں یا پھر معاف کردیں۔
خلاصۂ کلام:۔ خلاصۂ کلام یہ ہے کہ کسی بھی انسان کو قتل کرنا تو درکنار، ہم کسی بھی حال میں کسی بھی انسان کے قتل میں کسی بھی نوعیت سے معاون ثابت نہ ہوں، تاکہ ہم آخرت میں دردناک عذاب سے محفوظ رہیں۔ اگر کسی نے کوئی قتل کیا ہے، تو حکومت وقت ہی کو اسے قصاصاً قتل کرنے کا حق حاصل ہے۔
قارئین کرام! جاتے جاتے اللہ تعالیٰ سے دعا ہے کہ وہ ہمیں تمام گناہوں سے محفوظ رکھ کر یہ دنیاوی فانی زندگی گزارنے والا بنائے اور ہمیں دونوں جہاں میں کامیابی عطا فرمائے، آمین، ثم آمین!
……………………………………………
لفظونہ انتظامیہ کا لکھاری یا نیچے ہونے والی گفتگو سے متفق ہونا ضروری نہیں۔
