ہمارا، ادارہ برائے تعلیم و ترقی (آئی بی ٹی)، کا عزم ہے کہ حالات جس قدر بھی ناساز ہوں اور وسائل ناپید ہوں، ہم نے اپنی محبوب مادری زبان کے احیا اور فروغ کے لیے کسی بھی صورت میں کام جاری رکھنا ہے، اور اپنے لوگوں کے لیے اور تعلیمی، علمی و تحقیقی حلقوں کے لیے لکھت، پڑھت اور تحقیق کا مواد فراہم کرنا ہے۔ اس سلسلے میں آئی بی ٹی کئی دیگر اقدامات کے ساتھ کتابوں کی اشاعت بھی کرتا رہا ہے اور یہ ’’توروالی – انگلش ڈکشنری برائے طلبہ‘‘ اس سلسلے کی ایک کڑی ہے۔ یہ ڈکشنری کیسی ہے، اور اس میں کیا کیا شامل ہے؟ اس پر کچھ تفصیل نیچے لکھتے ہیں:
زبیر توروالی کی دیگر تحاریر پڑھنے کے لیے نیچے دیے گئے لنک پر کلک کیجیے:
https://lafzuna.com/author/zubair-torwali/
٭ ڈیزائن:۔ یہ لغت رنگین ہے اور اس کی چھپائی اچھے کاغذ پر کی گئی ہے۔ یہ درمیانے سائز کی کتابی صورت میں ہے۔ اس کے صفحات کی تعداد 230 بنتی ہے اور اس کا سرورق دیدہ زیب پیپر بیک میں بنایا گیا ہے۔ اس میں تصاویر بھی شامل ہیں۔
٭ اس کے مشمولات/مواد:۔ ظاہر ہے یہ دو زبانوں (توروالی اور انگریزی) میں ہے۔ اس میں 2500 کے قریب توروالی کے مین الفاظ دیے گئے ہیں۔ اس میں مقامات، اشیا، پودوں اور جانوروں کی تصاویر بھی دی گئی ہیں، جن کی تعداد 1200 کے قریب بنتی ہے۔ ہر صفحے پر گائیڈنگ لفظ بھی دیا گیا ہے، جو کسی لفظ کا صفحہ بتارہا ہوتا ہے۔
٭ یہ دائیں سے بائیں پڑھی جاتی ہے۔ ہر توروالی لفظ کا تلفظ بین الاقوامی حروف تہجی کے نظام (International Phonetic Alphabets) میں دیا گیا ہے، جو کہ غیر توروالی اور توروالی دونوں کے لیے مفید ہے۔ اس تلّفظ کے بعد الفاظ کے قواعد کے حساب سے مخفف دیا گیا ہے، تاکہ پتا چلے کہ آیا یہ لفظ فعل ہے، اسم ہے، اسمِ صفت ہے، فعل کی کون سی قسم ہے، ’’ایڈورب‘‘ ہے یا گرامر کے دیگر درجات میں شامل ہے۔
٭ آگے ہر توروالی مرکزی لفظ کا انگلش متبادل دیا گیا ہے۔ ان متبادل کی تعداد 1 سے 5 تک ہوسکتی ہے۔ اس کے بعد ہر توروالی لفظ کو عام سادہ جملے میں استعمال کیا گیا ہے اور ہر جملے کا انگریزی ترجمہ دیا گیا ہے۔
٭ پھر جہاں مناسب ہے، وہاں جملے کے بعد اس لفظ سے متعلق ایک تصویر دی گئی ہے اور اُس کا نام توروالی میں بھی لکھا گیا ہے۔ اس کے بعد اس تصویر میں اگر کوئی نایاب پودا، درخت یا جانور ہے، تو اُس کا سائنسی نام بھی لکھا گیا ہے۔
٭ ایک اہم انوکھی خاصیت جو اس ڈکشنری کی ہے، وہ اس میں الفاظ کے مختلف متغیرات دینے کی کوشش کی گئی ہے۔ چوں کہ کئی الفاظ توروالی دھرتی کے مختلف گاؤں میں مختلف طریقے سے ادا کیے جاتے ہیں، لہٰذا مقدور بھر اس فرق کو بھی مقدم رکھا گیا ہے۔ ان کو ظاہر کرنے کے لیے مختلف مخفف دیے گئے ہیں، جن کی تشریح اس ڈکشنری کے پہلے صفحات میں نقشوں کی مدد اور (Abbreviations) کے تحت دی گئی ہے۔ اس کو پڑھ کر ڈکشنری کو پڑھا جاسکتا ہے۔
دیگر متعلقہ مضامین:
موت کی خوشی (تبصرہ)
اینمل فارم (تبصرہ)
کاندید (تبصرہ)
جنت کی تلاش (تبصرہ)
کبڑا عاشق (تبصرہ)
٭ توروالی زبان کے دو لہجے (Dialects) ہیں۔ بحرین یا سینکأن لہجہ اور چیل لہجہ۔ اس میں چیل لہجے کا خیال بھی رکھا گیا ہے اور جو لفظ چیل لہجے میں مختلف ہے، اُس کے ساتھ علامت [چ] لکھا گیا ہے، جس سے مراد چیل کی توروالی ہے۔ دوسرے متغیرات کے لیے الگ مخفف دیے گئے ہیں۔
یہ ڈکشنری کس کے لیے مفید ہے؟
٭ نام سے ظاہر ہے یہ بنیادی طور پر طلبہ و طالبات کے لیے ہے۔ طلبہ و طالبات پرائمری سکول تا 16ویں اور پی ایچ ڈی درجوں تک اس سے استفادہ کرسکتے ہیں۔ ان کے علاوہ عام لوگ، نوجوان اور محققین اس سے مستفید ہوسکتے ہیں۔
٭ توروالی لوگ اس لغت کے ذریعے نہ صرف اپنی زبان کو مزید سیکھ سکتے ہیں، بلکہ وہ اس کے ذریعے انگریزی کو بھی سیکھ سکتے ہیں۔ اس طرح غیر توروالی اس ڈکشنری کی وساطت سے انگریزی کے راستے توروالی بھی سیکھ سکتے ہیں۔
٭ یہ اُن توروالی اساتذہ کے لیے نہایت مفید ہے، جو پرائمری یا ہائی سکولوں میں انگریزی یا انگریزی میں دوسرے مضامین پڑھاتے ہیں۔
اس کی قیمت کتنی ہے؟
چوں کہ ڈکشنری رنگین اور اچھے کاغذ پر زیورِ طبع سے آراستہ ہوئی ہے۔ اس لیے اس پر خرچہ بھی زیادہ آیا ہے۔ اس کی قیمت 1200 روپے رکھی گئی ہے۔ طلبہ کے لیے اس میں 50 فی صد رعایت ہے۔ یوں اُن کے لیے قیمت 600 روپے بنتی ہے۔ عام لوگوں، ماہرِ لسانیات اور محققین کے لیے یہ قیمت 1200 روپے ہے۔
ہم توقع کرتے ہیں کہ لوگ تعاون کریں گے اور اس لغت کو خرید کر ہمیں دوسری کتابوں کی چھپائی میں مدد دیں گے۔ دوسری کتابیں بھی چھپنے کے لیے تیار ہیں۔ ان میں ایک کتاب سورۂ رحمان کا توروالی میں ترجمہ اور تفسیر ہے ۔
اس ڈکشنری کے پیش لفظ ماہرین اور سکالر جیسے ڈاکٹر طارق رحمان اور ڈاکٹر سوسن ملون نے لکھے ہیں۔ طارق رحمان پاکستان کے ایک مایہ ناز عالم، ماہرِ لسانیات اور تاریخ دان ہیں جب کہ سوسن ملون امریکی ماہرِتعلیم و لسانیات ہیں اور یونیسکو کے لیے تعلیم اور خواندگی پر کام کررہی ہیں۔
یہ ڈکشنری بحرین میں ادارہ برائے تعلیم و ترقی (آئی بی ٹی) کے دفتر واقع کمبلئی راستہ درال روڈ پر اور بحرین بازار میں معاذ فوٹو سٹیٹ کے ساتھ دست یاب ہے۔
……………………………………
لفظونہ انتظامیہ کا لکھاری یا نیچے ہونے والی گفتگو سے متفق ہونا ضروری نہیں۔ اگر آپ بھی اپنی تحریر شائع کروانا چاہتے ہیں، تو اسے اپنی پاسپورٹ سائز تصویر، مکمل نام، فون نمبر، فیس بُک آئی ڈی اور اپنے مختصر تعارف کے ساتھ editorlafzuna@gmail.com یا amjadalisahaab@gmail.com پر اِی میل کر دیجیے۔ تحریر شائع کرنے کا فیصلہ ایڈیٹوریل بورڈ کرے گا۔
